Breytingar í Þorlákshöfn en Þór hefur fengið Darren Govens í sínar raðir á nýjan leik og við það hefur Vincent Sanford sagt sitt síðasta í Þorlákshöfn. Govens lék síðast með Þór þegar liðið hafnaði í öðru sæti Íslandsmótsins eftir úrslitaseríuna gegn Grindavík tímabilið 2011-2012.
 
 
„Hann ætti að vera klár í næsta leik á föstudag,“ sagði Benedikt Guðmundsson þjálfari Þórs í samtali við Karfan.is. Govens hefur síðan hann lék síðast með Þór haft viðkomu í Ísrael, Grikklandi og Ungverjalandi. „Við ákváðum að taka Govens þar sem við vissum nákvæmlega hvað við værum að fá. Ef við hefðum verið að leita eftir nýjum manni þá hefðum við mögulega tekið öðruvísi prófíl. Govens er ekki að fara að koma okkur af botninum í fráköstum í þessari deild en hann gerir margt annað sem á eftir að styrkja okkur,“ sagði Benedikt sem að öllum líkindum verður með Govens innanborðs þegar liðið mætir Keflavík á útivelli þann 23. janúar.