Stjórn Körfuknattleiksfélags Ísafjarðar leysti í morgun Jason Smith undan samningi sínum við félagið. Þetta kemur fram á heimasíðu KFÍ í dag.
Á heimasíðu KFÍ segir:
Stjórn Körfuknattleiksfélags Ísafjarðar leysti í morgun Bandaríkjamanninn Jason Anthony Smith undan samningi hans við félagið. Var það gert að ósk Jasons sem hefur fengið gott tilboð um að leika með körfuknattleiksliði í Brasilíu.
Stjórn KFÍ þakkar Jason fyrir afar gott starf í þágu liðsins, jafnt innan sem utan vallar, og óskar honum alls hins besta á nýjum og krefjandi vettvangi.
Vænta má þess að nýr erlendur leikmaður bætist fljótlega í hóp leikmanna KFÍ og verður greint nánar frá því í fyllingu tímans. Mirko Virijevic, sem átt hefur frábært tímabil hjá KFÍ í vetur, mun taka við þeim verkefnum sem Jason hefur haft með höndum í yngri flokkum KFí.
