Deildin er hálfnuð og því eina í stöðunni að taka tölfræðitékk á henni.  Snæfell hefur tekið forystuna í skilvirkni liða en mesta athygli vekur gríðarlegt stökk Haukastúlkna sem rjúka upp úr sjötta sæti í annað. Athygli vekur einnig staða Grindavíkur sem er þriðja besta varnarliðið en skelfileg sóknarskilvirkni liðsins dregur það niður í sjöunda sætið í heildina.
 
Lele Hardy hjá Haukum ber höfuð og herðar yfir öðrum leikmönnum deildarinnar. PER yfir 50 á í raun að vera ómögulegt (allt fyrir ofan 30 er LeBron og MJ kaliber) en hlutfallslegur hæfni hennar samanborið við aðra leikmenn er ástæðan fyrir þessu feiknaháa gildi.  Bryndís Guðmundsdóttir hjá Keflavík er að eiga frábært tímabil. Hún er með besta PER gildi allra íslenskra leikmanna og er í sjötta sæti í heildina. Gríðarlega skilvirkur leikmaður með 54,8% sóknarnýtingu sem er þriðja besta allra leikmanna deildarinnar. KR stúlkur taka tæplega 40% allra skota fyrir utan þriggja stiga línuna og jafnframt leyfa hæsta hlutfall þriggja stiga skota andstæðinga eða yfir 33%.
 
Hér að neðan má sjá greiningu á liðum Dominosdeildar kvenna eftir Four Factors aðferð eftir fyrri hluta deildarkeppninnar.  Þá eru teknir saman fjórir þættir sem taldir eru hafa hvað mest áhrif á leik liða í sókn og vörn, en þeir eru virk skotnýting (eFG%), hlutfall tapaðra bolta (TOV%), hlutfall sóknarfrákasta (ORB%) og að lokum hlutfall skoraðra víta á móti skottilraunum utan að velli (FT/FGA). Í sókn eru þetta gildi fyrir liðið sjálft en í vörn eru þetta gildi fyrir andstæðinga liðanna. Hægra meginn við hvern þátt kemur fram í hvaða sæti liðið lendir meðal hinna liðanna í hverjum þætti.
 
 
Á myndinni hér að neðan má sjá vegið meðaltal þessarra þátta í sókn (S) og vörn (V), þ.e. vegið meðaltal á sætaskipan liðanna í hverjum þætti. Skotnýtingin (eFG%) fær mesta vigt eða 40%, tapaðir boltar (TOV%) 25%, sóknarfráköstin (ORB%) 20% og að lokum hlutfall víta og skottilrauna (FT/FGA) 15%. Jafnt meðaltal þessara tveggja vegnu meðaltala sýnir svo “Alls” dálkinn. Lægstu gildin í S, V og Alls dálkunum sýna bestu liðin í sókn, vörn og í heildina. ORgt er Offensive Rating og táknar skoruð stig per 100 sóknir og DRgt er Defensive Rating og táknar skoruð stig andstæðinga per 100 sóknir. Pace er meðaltal sókna liðs og andstæðings í leik og táknar leikhraðann sem liðin spila á. OffFloor% og DefFloor% meta skilvirkni sókna og varna. Floor% sýnir hlutfall sókna þar sem skorað er a.m.k. eitt stig á móti öllum sóknum. Hlutfall sem sýnir nýtingu liða á þeim sóknum sem spilaðar eru. Hátt gildi í OffFloor% er jákvætt en lágt gildi í DefFloor% er jákvætt.  Liðunum á þessari mynd og myndinni að ofan er raðað upp eftir gildum í “Alls” dálkinum.
 
 
Á myndinni hér að neðan sést dreifing stigaskors og skotval liðanna og andstæðinga þeirra. Með þessu er hægt að sjá áherslur liða í sókn og vörn. Hverjir skjóta meira en aðrir fyrir utan þriggja stiga línuna og hverjir gefa þau skot eftir, hverjir sækja hæst hlutfall stiga sinna af vítalínunni, o.s.frv. Liðum er raðað upp eftir stafrófsröð.
 
 
Hér að neðan má sjá 20 efstu leikmenn Dominosdeildar kvenna í PER (Player Efficiency Rating). Lágmark allra tölfræðiliða miðast við að leikmaður hafi spilað a.m.k. 213 mínútur í heildina sem er rúmlega 38% af þeim leiktíma sem nú er uppsafnaður. Skýringar á merkingu tölfræðiliðanna má sjá neðst á síðunni.
 
 
Sama tafla nema með einungis 10 bestu íslensku leikmönnunum.
 
 
MPG – Meðaltal mínútna spilaðra í leik.
 
PPG – Meðaltal stiga skoraðra í leik.
 
FPG – Meðaltal framlags í leik.
 
AST% – Áætlað hlutfall skoraðra karfa utan að velli sem leikmenn liðs skoruðu eftir stoðsendingu leikmanns á meðan hann var inni á vellinum.
 
A/TO – Hlutfall stoðsendinga leikmanns á móti töpuðum boltum.
 
BLK% – Áætlað hlutfall skota andstæðings sem leikmaður varði á meðan hann var inni á vellinum.
 
DRB% – Áætlað hlutfall mögulegra varnarfrákasta sem leikmaður tók á meðan hann var inni á vellinum.
 
eFG% (Effective Field Goal Percentage) – Mælikvarði á skotnýtingu sem leiðréttir fyrir þeirri staðreynd að þriggja stiga karfa er einu stigi verðmætari en tveggja stiga. T.d. ef annars vegar leikmaður A skorar 4 körfum í 10 tilraunum og þar af voru 2 utan þriggja stiga línunnar og hins vegar leikmaður B sem skorar 5 körfur í 10 tilraunum og engin þriggja stiga. Báðir leikmenn skora 10 stig og virk skotnýting þeirra því sú sama eða 50%.
 
Floor% – Hlutfall sókna sem leikmaður skorar a.m.k. 1 stig á móti öllum sóknum sem leikmaður tekur þátt í.
 
ORB% – Áætlað hlutfall mögulegra sóknarfrákasta sem leikmaður tók á meðan hann var inni á vellinum.
 
PER – Player Efficiency Rating er gildi sem mælir skilvirkni og frammistöðu leikmanna og var sett saman af John Hollinger sem lengi skrifaði fyrir ESPN en er nú framkvæmdastjóri Memphis Grizzlies. PER tekur saman það jákvæða og dregur frá það neikvæða í frammistöðu leikmanns og skilar mati henni með tillit til leiktíma.
 
PPP – Stig per sókn.
 
TRB% – Áætlað hlutfall allra mögulegra frákasta sem leikmaður tók á meðan hann var inni á vellinum.
 
Usg% – Áætlað hlutfall sókna sem voru nýttar af leikmanni á meðan hann var inni á vellinum. Gefur vísbendingu um þátttöku leikmanns í sóknarleik liðsins.