Mikilvægur sigur Spurs gegn OKC

Fimm leikir fóru fram í NBA deildinni í nótt og beindust flestra augu vafalítið að stórslag San Antonio Spurs og Oklahoma City Thunder. Spurs höfðu betur í slagnum 105-93 og þá fengu liðsmenn New York Knicks stóran skell þegar þeir heimsóttu Golden State í Oracle Arena.

 

Tony Parker lék ekki með Spurs í leiknum en stigahæstur í liði Spurs að þessu sinni var Tiago Splitter með 21 stig og 10 fráköst. Alls sex leikmenn Spurs gerðu 11 stig eða meira í leiknum og næstur á mælendaskránni á eftir Splitter var Kawhi Leonard með 17 stig. Kevin Durant gerði 26 stig, tók 6 fráköst og gaf 5 stoðsendingar hjá OKC. Russell Westbrook bætti við 25 stigum, 6 fráköstum og 3 stoðsendingum og Serge Ibaka landaði tvennu með 13 stig og 16 fráköst. Spurs tróna á toppi vesturdeildarinnar með 49 sigra og 15 tapleiki en Oklahoma fylgja þar fast á eftir með 47 sigra og 17 tapleiki.

 

Stephen Curry var stigahæstur hjá Golden State með 26 stig, 6 fráköst og 4 stoðsendingar. Hjá New York var Carmelo Anthony með 15 stig, 4 af 15 í teignum og 0 af 2 í þristum en tók þó 10 fráköst. J.R. Smith var hent út úr húsi í leiknum og kvaddi hann leikinn með 9 stig en brottrekstrarsökin virtist nokkuð lítil.