Miami enn að bæta sitt eigið met

Níu leikir fóru fram í NBA deildinni í gær og í nótt. Meistarar Miami Heat bættu enn við félagsmetið sitt þegar liðið vann átjánda deildarleikinn í röð. Að þessu sinni voru það Indiana Pacers sem fengu að kenna á mætti meistaranna.

 

LeBron James hafði tiltölulega hægt um sig með 13 stig í leiknum, 6 fráköst og 7 stoðsendingar en atkvæðamestur í liði Miami var Mario Chalmers með 26 stig og 7 fráköst. Chris Bosh bætti við 24 stigum og Dwyane Wade gerði 23. Hjá Indiana var David West stigahæstur með 24 stig. 18 sigurleikir í röð er eins og áður greinir nýtt félagsmet hjá Miami og lengsta sigurganga tímabilsins til þessa. Þá í fyrsta sinn í sögu félagsins hefur Miami nú lagt öll lið deildarinnar að velli á tímabilinu.