Haukar tóku toppsætið í 1. deildinni í gærkvöld þegar þeir unnu sinn níunda leik í röð og nú urðu liðsmenn Breiðabliks fyrir barðinu á Hafnarfjarðarliðinu. Haukar hafa ekki tapað leik síðan liðið skipti um þjálfara fyrir jól og hefur verið að vinna með 27,2 stigum að meðaltali.
 
Breiðablik byrjaði leikinn hins vegar betur í gær og alveg ljóst að þeir ætluðu sér að endurtaka leikinn frá því í fyrri umferðinni og sigra Haukaliðið. Breiðablik var fyrir leikinn í gær í bullandi baráttu við Þór Akureyri um síðasta sætið í úrslitakeppninni en nú er ljóst hvaða lið fara í úrslitakeppnina. Stóra spurningin er bara hvaða lið fer beint upp í úrvalsdeild því Haukar hafa enn möguleikann á því líkt og Valur.
 
Blikar náðu mest fimm stiga forystu í fyrsta leikhluta og settu Hauka í aðstöðu sem þeir hafa ekki verið vanir að vera í og sýndi það sig vel í því að leikmenn Hauka voru allir sífellt tuðandi í dómurum leiksins. Um leið og það hætti snéru þeir leiknum sér í vil og breyttu stöðunni úr 11-14 í 24-14 og þannig endaði fyrsti leikhluti.
 
Haukaliðið hélt áfram að bæta í og náði mest 17 stiga forskoti í öðrum leikhluta. Það var ljóst að Haukar lögðu mikið upp með að stoppa Þorstein Gunnlaugsson hjá Blikum og gekk það svo sem ágætlega. Þrátt fyrir það var Þorsteinn með yfir 20 stig og kringum 10 fráköst í leiknum og var öðrum að ólöstuðum besti leikmaður Blika í gær.
 
Haukar leiddu með 17 stigum í hálfleik, 46-29, og átti þessi munur bara eftir að stækka. Hann varð mestur um miðbik þriðja leikhluta en þá náðu Haukar 29 stiga forskoti og ljóst að róðurinn yrði gífurlega þungur fyrir Breiðablik ef þeir ætluðu að ógna Haukaliðinu á einhvern hátt.
 
Blikar börðust vel og náðu forskotinu niður fyrir 20 stig í fjórða leikhluta en það dugði ekki til og Haukar unnu öruggan 23 stiga sigur, 101-78.
 
Haukar: Terrence Watson 24/10 fráköst, Emil Barja 19/6 stolnir, Davíð Páll Hermannsson 12/7 fráköst, Helgi Björn Einarsson 10/6 fráköst/5 stoðsendingar/3 varin skot, Þorsteinn Finnbogason 9, Kristinn Marinósson 8, Sigurður Þór Einarsson 7, Steinar Aronsson 6, Elvar Steinn Traustason 2/5 stoðsendingar, Guðmundur Kári Sævarsson 2, Jón Ólafur Magnússon 1, Andri Freysson 0.
 
Breidablik: Christopher Matthews 23/7 fráköst/6 stoðsendingar, Þorsteinn Gunnlaugsson 22/9 fráköst, Hraunar Karl Guðmundsson 10, Atli Örn Gunnarsson 8/5 fráköst, Garðar Pálmi Bjarnason 5/4 fráköst, Halldór Halldórsson 3, Pálmi Geir Jónsson 3/5 fráköst/3 varin skot, Aðalsteinn Pálsson 3/4 fráköst, Egill Vignisson 1, Ásgeir Nikulásson 0, Haukur Þór Sigurðsson 0, Hákon Bjarnason 0.