23 í röð hjá Miami

Í nótt fóru fram 11 leikir í NBA deildinni og þrátt fyrir þennan aragrúa af leikjum beindust eflaust flestra augu að viðureign Boston Celtics og Miami Heat. LeBron James hafði aldrei unnið leik í Boston með Miami fyrir leikinn í nótt en það átti eftir að breytast.

 

 

Ekki nóg með að Miami hafi unnið leikinn 103-105 á útivelli þá var enginn betri en LeBron James í leiknum sem skoraði 37 stig, gaf 12 stoðsendingar og tók 7 fráköst. Í eftirrétt fékk hann sér svo tvo stolna bolta og tvö varin skot. LeBron James gerði sigurstigin úr stökkskoti í teignum þegar um tíu sekúndur lifðu leiks og þar með var tuttugasti og þriðji sigur Miami í röð staðreynd! Þá batt Heat enda á 11 leikja sigurgöngu Boston á heimavelli. Stigahæstur í heimaliði Boston var svo Jeff Green með stórleik, 43 stig og 7 fráköst.