Hörður Axel Vilhjálmsson hefur ákveðið að draga sig úr íslenska landsliðshópnum. Morgunblaðið greinir frá þessu í dag. Ástæðan mun vera sú að þýska liðið hans, Mitteldeutcher BC, vill að leikmaðurinn taki þátt í öllu undirbúningstímabili liðsins.
Í Morgunblaðinu í dag segir Hörður:
 
,,Þetta er eitthvað sem ég var að ákveða núna eftir að hafa íhugað þetta vel og vandlega í tvo, þrjá mánuði. Þetta er alveg hrikalega erfið ákvörðun og leiðinleg en ég taldi að þetta yrði best fyrir mig eins og staðan er í dag," segir Hörður og bætir við: ,,Ég sé samt mjög mikið eftir landsliðinu og hafði hlakkað til að spila þessa leiki.
 
Nánar er rætt við Hörð í Morgunblaðinu í dag en ljóst er að íslenska liðið missir þarna einn af sínum sterkustu bakvörðum.