Fram kemur á www.haukar.is að leiktíðin sé á enda hjá Guðrúnu Ósk Ámundadóttur sem meiddist í leik tvö gegn Keflavík í undanúrslitum Íslandsmótsins en hún er með slitið krossband í hægra hné.

Má segja að leikur Hauka og Keflavíkur sé merkilegur fyrir þær sakir að tveir leikmenn Hauka slitu krossband í þessum leik en Íris Sverrisdóttir meiddist einnig.
 

Á www.haukar.is segir:
 
Í fyrstu var talið að meiðsli Guðrúnar væru minni háttar en í ljós kom að hún er einnig, líkt og Íris, með slitið krossband í hægra hné og mun því missa af restinni af leiktíðinni sem og lunganu úr næsta tímabili. Guðrún fer í aðgerð í í lok maí og ef allt gengur eftir á hún að geta snúið aftur í janúar 2013 en átta til níu mánuði tekur að jafna sig eftir aðgerð.
 
Guðrún sagði í samtali við Hauka.is að þetta væri gríðarlegt áfall í ljósi þess að skemmtilegasti tími leiktíðarinnar væri að hefjast. „Það er í raun ekki hægt að lýsa því hvað þetta er gríðarlegt áfall og sérstaklega á þessum tímapunkti þar sem að skemmtilegasti partur tímabilsins er að byrja.“
 
Guðrún mun að sjálfsögðu planta sér á hliðarlínuna í staðinn og hvetja þær áfram þaðan. „Ég hef fulla trú á mínu liði og verð með þeim á hliðarlínunni og hvet þær áfram,“ sagði hún og bætti við þegar hún var beðin um að spá fyrir úrslitin: „Við tökum þetta 3-1.“

www.haukar.is