Að þessu sinni eru það ekki tölurnar sem ráða ferðinni heldur eitt eftirminnilegt atvik. Við á Karfan.is höfum útnefnt Ólaf Ólafsson leikmann Grindavíkur Gatorade-leikmann undanúrslitarimmu Grindavíkur og Stjörnunnar. Ólafur splæsti í eitt stykki sögulega stund í Garðabæ þegar hann kvaddi leiktíðina.
Eins og flestum er vel kunnugt meiddist Ólafur afar illa í fyrsta leikhluta í leik fjögur en þá mættust liðin í Ásgarði. Kalla þurfti til sjúkrabíl og þegar Ólafur var kominn upp á börurnar sendi hann sínum liðsmönnum baráttukveðjur af börunum um leið og allir viðstaddir klöppuðu fyrir Ólafi þegar hann var fluttur á brott. Vissulega smá bandarískur kvikmyndakeimur af þessu öllu saman og það gerðist hjá okkur á litla Íslandi. Vissulega stóðu margir sig vel í einvíginu en samkvæmt pennum og ljósmyndurum Karfan.is á Óli skilið kippu af Gatorade fyrir þetta magnaða ,,moment."