,,Það er frábært að horfa á þessa stráka, sérstaklega Geitunginn, Ægi Þór Steinarsson. Hann er gulur, hann er snöggur og hann stingur,” segir í frétt hjá NBA Ísland í dag. Kapparnir á vefsíðunni hnyttnu eru búnir að gefa Ægi nafn og óvíst hvort hann losni undan þessu í bráð.
Frétt NBA Ísland um nafngift Ægis og leik Fjölnismanna í gær:
 
Heimabrugg: Geitungurinn
 
Duttum í Grafarvoginn í gær og sáum Fjölnismenn taka á móti Snæfelli. Mjög hressandi leikur, frábær skemmtun. Snæfell hafði þetta í restina en það sem upp úr stóð var að skrumið sem dunið hefur á okkur um ungu mennina í Fjölni á fullan rétt á sér.
 
Það er frábært að horfa á þessa stráka, sérstaklega Geitunginn, Ægi Þór Steinarsson. Hann er gulur, hann er snöggur og hann stingur
 
Guttinn bauð upp á 25/11/4/4, flotta hittni og boltameðferð að hætti CP3. Þetta er strákur sem þú ættir að kíkja á við fyrsta tækifæri. Óvíst að hann verði mikið lengur á klakanum.
 
Getum ekki beðið eftir að sjá hann og hans menn sækja Stjörnuna heim á sunnudaginn. Þar eru á ferðinni tvö hörkulið sem töpuðu með súrum hætti í fyrstu umferðinni og það verður gaman að sjá Ægi og Shouse kljást í Ásgarði. Mælum eindregið með því.
 
NBA Ísland

Ljósmynd/ Tomasz Kolodziejski