Mikil hefð fyrir körfubolta á Suðurlandi

”Mér finnst uppgangur körfuboltans á Suðurlandi vera afar gott mál.  Við hjá HSK höfum haldið HSK mót í körfuknattleik síðan 1964.  Mörg sunnlensk liða hafa byrjað í þessum mótum í upphafi starfs og þegar þeim hefur vaxið fiskur um hrygg taka þau þátt í Íslandsmeistaramótum KKÍ.  Þannig höfum við lagt grunninn að velgengni margra liða.  Þegar áhugi þeirra á HSK – mótunum minnkar drögum  við þau einfaldlega saman eða þau leggjast af.  Sennileg má einnig skýra velgengnina að einhverju leyti með því að sunnlensk lið hafa ekki náð góðum árangri í öðrum boltagreinum og þegar vel fer að ganga í körfunni þá fylgir áhugi krakkanna á eftir og þetta vindur upp á sig.”

En sérðu einhver félög utan þessara fimm í efstu deildunum tveimur sem eiga eftir að koma upp á næstu árum?

”Vestmannaeyingar (Reyndar ekki í HSK) voru eitt af liðunum í undanúrslitum 2.deildar  þannig að líklegt er að við sjáum þá ofarlega í þeirri deild á næstu árum.  Því miður hefur starfið í Drangi (Ungmennasamband Vestur Skaftfellinga) dregist saman eftir brotthvarf Justin Shouse og Björns Hjörleifssonar.  Ég sé nú ekki aðra fyrir mér á næstunni líklega til afreka í annarri deild.”

Eins og Gísli Páll bendir á þá er eina af skýringunum eflaust að finna í héraðsmóti þeirra, HSK mótinu sem hófst 1964. Ef litið er á sigurvegara þess móts þá voru Laugdælir nokkurn vegin einráðir fyrstu 30 árin. Lið Laugdæla var líka kjarninn í liði HSK sem tók fyrst þátt í Íslandsmótinu 1964 í 2. deild (næst efstu deild) en það ár var í fyrsta skipti leikið í 2. deild. Annað sunnlenskt lið var með í deildinni það ár en það var lið Mímis sem hefur löngum verið lið Menntaskólans á Laugarvatni. Lið HSK vann sér svo rétt til að leika í efstu deild vorið 1969 og lék þar í 5 ár. Liðið lék ýmist undir merkjum HSK, Laugdæla eða Mímis á þessum árum og var eina liðið af svæði HSK allt fram til 1990 þegar 2. deild karla, sem þá var orðin þriðja efsta deild var endurvakin eftir nokkurt hlé. Veturinn 1990 til 91 voru 4 lið af félagssvæði HSK, Selfoss, Gnúpverjar, Laugdælir og Hrunamenn, 2 árum seinna bættust svo Mímir og ÍKÍ við og nokkrum árum seinna Hamar og Hrunamenn. Það var svo fyrir þremur árum að lið FSu var stofnað og hóf keppni í 1. deild. Að auki hafa lið Drangs og Vestmanneyinga oft á tíðum verið með í Suðurlandsriðlum 2. deildar og hafa bæði lið leikið í 1. deild.

Árangurinn á Suðurlandi er líka merkilegur fyrir þær sakir að á félagssvæðinu öllu búa aðeins 17861 manns miðað við 1. desember 2007. Það er svipað og býr á Akureyri en á Akureyri er aðeins 1 félag, þá er þetta aðeins minna en býr í Kópavogi og í Kópavogi eru aðeins 2 félög. Iðkendur á félagssvæði HSK voru 1076 árið 2007 og hafði fjölgað um 34 frá árinu á undan og eru þessir iðkendur í 14 félögum en t.d. hafa Laugdælir ekki skráð sína félagsmenn svo það má reikna með að fjöldi iðkenda á svæðinu sé yfir 1100 núna sem er ca 1/8 af öllum iðkendum á landinu.

Gylfi Þorkelsson er einn þeirra sem hefur fylgst lengi með körfuboltanum á Suðurlandi. Hann var sammála Gísla Páli um að áratuga hefð fyrir skipulögðu mótahaldi væri grunnurinn að velgengni sunnlenskra liða. Hann hóf sjálfur að keppa í hérðasmótum fyrir allnokkrum árum en þá var leikið gamla íþróttahúsinu á Laugarvatni, en það er búið að rífa núna. Það þótti svo stórt að strákarnir sem voru að æfa í Aratungu, Borg, Árnesi og fleiri félagsheimilium fengu víðáttu brjálæði þegar þeir komu á Laugarvatn. Einnig sagði Gylfi að grunnurinn að körfubolta á Flúðum og Laugarvatni væri mjög gamall og hefur verið byggt vel ofan á hann en svo hafa bæst við félög í seinni tíð á Selfossi, Hveragerði og Þorlákshöfn og nefndi Gylfi einnig sérstaklega að enn væri lið á Laugalandi í Rangárvallasýslu.

Við látum fljóta með lista yfir sigurvegara í hérðasmótum HSK frá upphafi.