Í kvöld fara fram undanúrslit karla í Poweradebikarkeppninni þegar Keflavík tekur á móti KFÍ í Toyota-höllinni og Tindastóll fær KR í heimsókn í Síkið í Skagafirði. Báðir leikirnir hefjast kl. 19:15. Fastlega má gera ráð fyrir að Tindastóll TV sýni frá sínum leik og þá hefur Karfan.is heimildir fyrir því að KFÍ TV ætli að reyna útsendingu frá Reykjanesbæ.

KR á titil að verja og hafa einnig unnið alla átta bikarleiki sína undir stjórn Hrafns Kristjánssonar og með sigri í kvöld kemst KR í Laugardalshöllina í þriðja sinn á fjórum árum. Einnig er þetta í fyrsta sinn sem undanúrslitaleikur í bikarkeppninni fer fram í Skagafirði í karlaflokki og því má fastlega gera ráð fyrir því að Skagfirðingar troðfylli Síkið. Hafi Stólarnir sigur í kvöld komast þeir í Laugardalshöll í fyrsta sinn í sögu félagsins.

 

Í hinni rimmunni eru Keflavík og KFÍ bæði lið sem komist hafa í Höllina áður og þegar KFÍ fór í sitt fyrsta og eina skipti troðfylltu þeir þjóðarleikvanginn. Keflavík hefur tapað síðustu tveimur undanúrslitaleikjum sínum og léku síðast til bikarúrslita fyrir sex árum en KFÍ var í Höllinni árið 1998.