Stoudemire hefur verið hjá Phoenix Suns allan sinn feril, en fékk sig lausan frá síðasta ári samnings síns eftir frekar stormasöm misseri þar sem eigandi Suns hefur falboðið hann í skiptum út um alla deild.

 

Suns voru ekki tilbúnir að bjóða honum viðlíka samning og Knicks, sérstaklega þar sem hann hefur átt við erfið meiðsli að etja síðustu ár, m.a. í hné og auga.

 

Þeir voru aukinheldur ekki tilbúnir til að bíða eftir að Stoudemire léti reyna á markaðinn í sumar og fóru því þá leið að ráða annan framherja, Hakim Warrick, til fjögurra ára og 18 milljóna dala.

 

Knicks voru hins vegar ekki í vafa og urðu í raun að fá a.m.k. einn toppleikmann til að réttlæta ömurlegheitin sem hafa verið þar viðvarandi í niðurskurði siðustu ára.

 

Knicks eru þó ekki hættir og hafa rætt við Dirk Nowitzki og auðvitað LeBron James og vonast til að bæta annari stjörnu í leikmannahóp sinn.

 

Það er svo annars að frétta að Paul Pierce mun sennilega ljúka ferli sínum hjá Boston Celtics, en hann samdi í dag við liðið sitt um fjögurra ára framlengingu upp á 61 milljón dala. Pierce hefur verið öll sín 12 ár hjá Boston og eiga Danny Ainge og félagar á skrifstofu Celtics aðeins eftir að semja við Ray Allen til að halda saman stóru þrenningunni, því að Kevin Garnet er með samning til tveggja ára í viðbót.