Karfan.is - Uppgjör fjórtándu umferðar í IEX deild karla

NÝJUSTU ÚRSLIT...

26 01 2010 | 14:16

Uppgjör fjórtándu umferðar í IEX deild karla

Fjórtándu umferð Iceland Express deildar karla lauk í gærkvöldi þar sem Íslandsmeistarar KR tylltu sér einir á toppinn eftir öruggan sigur á Tindastól. Njarðvíkingar lágu á heimavelli gegn Grindavík og urðu gulir og glaðir fyrstir til þess að vinna Njarðvík í Ljónagryfjunni þetta tímabilið. Þá bárust Selfyssingum heldur betur gleðitíðindi þegar FSu vann sinn fyrsta deildarleik á tímabilinu með 100-104 útisigri á Breiðablik í Smáranum. Í kjölfarið hefur botnbaráttan ekki síður orðið spennandi en toppbaráttan.

Úrslit umferðarinnar:

Stjarnan 87-93 Snæfell

Hamar 102-81 ÍR

Fjölnir 84-103 Keflavík

Breiðablik 100-104 FSu

KR 106-71 Tindastóll

Njarðvík 99-102 Grindavík

Hólmarar gerðu góða ferð í Garðabæ og lögðu Stjörnuna 87-93 þar sem Emil Þór Jóhannsson fór á kostum í liði Snæfells og skoraði dýrmæt stig á lokasprettinum. Byssan Sean Burton ætlaði að byrja leikinn með látum við þriggja stiga línuna en snöggkólnaði skyndilega og endaði með 4 af 14 í þriggja stiga skotum. Stjörnumenn telfdu fram Guðjóni Lárussyni en leikmaðurinn hefur verið að ná sér af langvarandi meiðslum. Adam var samt ekki lengi í Paradís því fyrir leikinn tognaði Birkir Guðlaugsson á ökkla og meiðslagrýlan því enn við lýði í Garðabæ.

Hamarsmenn skelltu ÍR 102-81 í Hveragerði þar sem Oddur Ólafsson dældi 20 stigum yfir ÍR-inga í fyrsta leikhluta! Eiríkur Öndunarson var kominn á nýjan leik í ÍR-búning og setti niður 17 stig en ÍR situr í 8. sæti deildarinnar og berst hart fyrir því að komast í úrslitakeppnina.

Fjölnir fékk skell gegn Keflavík en síðan Draelon Burns kom til Keflavíkur hafa þeir vart stigið feilspor. Gunnar Einarsson heldur líka áfram að sýna sér yngri og óreyndari leikmönnum hvað sé hægt að uppskera með eljusemi en kappinn er sennilegast í besta forminu af öllum leikmönnum deildarinnar og hefur verið magnaður upp á síðkastið.

Selfyssingar geta andað örlítið léttar þar sem fyrstu stigin eru komin í hús en menn hafa þó kastað því fram að með sigri sínum í Kópavogi hafi FSu nánast sent Blika í 1. deild. Ótímabær umræða enda hafa liðsmenn FSu sýnt á sér klærnar undanfarið og spennan í botnbaráttunni ekki síðri en í toppbaráttunni svo menn skulu ekki slá neinu föstu, ekki strax að minnsta kosti.

Stólarnir mættu einbeittum KR-ingum í DHL-Höllinni en helsta hlutverk Tindastóls í Vesturbænum var að láta KR líta vel út. Ekkert skal tekið frá Íslandsmeisturunum en gestir þeirra að norðan voru hreint ótrúlega lélegir. Andlausir og stefnulausir og makalaust að sterkir leikmenn á borð við Axel Kárason, Svavar Atla Birgisson, Friðrik Hreinsson, Helga Margeirsson og Helga Rafn Viggósson bjóði sjálfum sér og stuðningsmönnum sínum upp á svona körfubolta.

Þá töpuðu Njarðvíkingar öðrum Suðurnesjaslagnum í röð er þeir lágu á heimavelli gegn Grindavík. Páll Axel Vilbergsson funhitnaði í Njarðvík og þá var Ólafur Ólafsson sterkur á svellinu. Búast má við að Sigurður Ingimundarson sé að þjappa í eina ,,hárþurkumeðferð“ enda hafa Njarðvíkingar valdið töluverðum vonbrigðum síðan Nick Bradford gekk til liðs við hópinn. Þorleifur Ólafsson var fjarri góðu gamni í Grindavíkurliðinu í gær en gulir hafa glímt við töluverð meiðsli undanfarið. Sigurinn er því sérlega sætur fyrir Grindvíkinga, að leggja Njarðvík án eins af lykilmönnum sínum.

Stigahæstu leikmenn hjá hverju liði í 14. umferð:

Richard Williams – FSu – 38 stig

Páll Axel Vilbergsson – Grindavík – 32 stig

Marvin Valdimarsson – Hamar – 29 stig

Christopher Smith – Fjölnir – 27 stig

Gunnar Einarsson – Keflavík – 25 stig

Jonathan Schmidt – Breiðablik – 22 stig

Justin Shouse – Stjarnan – 22 stig

Sean Burton – Snæfell – 22 stig

Magnús Þór Gunnarsson – Njarðvík – 21 stig

Kenney Boyd – Tindastóll – 21 stig

Brynjar Þór Björnsson – KR – 19 stig