San Antonio Spurs fóru illa að ráð sínu þegar þeir töpuðu fyrir Cleveland Cavaliers í nótt, 97-95. Cavs voru án LeBron James og Shaquille O‘Neal auk þess sem Antawn Jamison meiddist í fyrri hálfleik og lék ekki meira eftir þriðja leikhluta. Spurs voru að vísu án Tony Parkers, sem er handarbrotinn, en Manu Ginobili átti sinn besta leik í mörg ár þar sem hann skoraði 38 stig.

 Meistarar LA Lakers töpuðu í nótt sínum þriðja leik í röð þegar þeir máttu játa sig sigraða gegn Orlando Magic, andstæðingum sínum í úrslitum NBA síðasta vor, 96-94. Þetta er í fyrsta sinn í tvö ár sem Lakers tapa þremur í röð.

 

 

New Jersey Nets færðust einu skrefi fjær sögubókunum með sigri á grönnum sínum í New York Knicks í nótt, 93-113. Þeir hafa nú unnið sjö leiki og hafa 27 leiki til að vinna þrjá leiki og komast upp fyrir lið Philadelphia 76ers frá árinu 1972-73, sem unnu aðeins 9 leiki, sem er versti árangur allra tíma.

 

39 stig frá Kobe Bryant voru ekki nóg til að tryggja LA Lakers sigur í Miami í nótt þar sem heimamenn í Heat fögnuðu þriggja stiga sigri, 114-111, eftir framlengingu. Leikurinn var ótrúlega spennandi þar sem liðin skiptust á að leiða, en Heat voru í lykilstöðu þegar skammt var eftir af venjulegum leiktíma. Þeir höfðu átta stiga forskot og 3:40 eftir, en Lakers unnu sig upp aftur og það var enginn annar en Kobe sem tryggði sínum mönnum framlengingu með stökkskoti á síðustu sekúndum leiksins.